ЯҢАЛЫКЛАР

2023 елның 29 октябрь көнне комсомолны кабул итүгә 105 ел тула. Шушы олы юбилей уңаеннан  пәнҗешәмбе көнне район китапханәсендә “Өлкәннәр” клубы , комсомолның тормыш мәктәбен үткән буын вәкилләре очрашты. Бүгенге өлкән яшьтәгеләр ул чорны сагынып искә ала, чөнки аларның яшьлеге комсомол дәверенә туры килгән. Илнең берничә буын гражданы, ягъни ике йөз миллионга якын кеше, комсомол мәктәбен үткән. Бу – ил тормышындагы үзе бер дәвер, чөнки Ленин комсомолы кебек көчле яшьләр хәрәкәте тарихта башкача теркәлмәгән. Чарада катнашкан һәркем районның комсомол, пионер эшчәнлеген яктырткан китапларын, шигырьләрен, җырларын, шулай ук октябрят, пионер, комсомол атрибутикасы булган галстуклар, барабан, боргы, значоклар, һәм башка әйберләрне кызыксынып карады.

Китаплар безне кечкенәдән каршы алалар һәм гомер буена якын дус булып калалар. 26нчы октябрь көнне Саба район балалар китапханәсе хезмәткәрләре   1нчы номерлы "Шатлык" балалар бакчасының уртанчылар төркеме балалары өчен «Китаплар төрле була» дип исемләнгән китапханә дәресе үткәрделәр.  Балалар китапханәдә бик күп төрле формада  китаплар барлыгын белделәр. Үз куллары белән тотып карап, китаплар турында мәгълүмат алдылар. Шулай ук китап басмалары белән эш итү кагыйдәләрен искә төшерделәр.

Татарстанда Милли мәдәниятләр һәм гореф-гадәтләр елы уңаеннан, 25 октябрь көнне  Саба район балалар китапханәсе хезмәткәрләре  “Китапсөярләр” клуб берләшмәсе өчен   “Безнең уен” дип исемләнгән әдәби-интеллектуаль уен үткәрделәр. Уен 5 өлештән торды: “Күңел ачкычы”, “Милли киемнәр”, “Милли ашлар”,  “Милли бәйрәмнәр” һәм “Туган ягым Татарстан”. Укучылар бер дә сынатмадылар, актив катнашып, биремнәргә дөрес җавап биреп үз белемнәрен, осталыкларын күрсәттеләр.

25 октябрь көнне Саба район китапханәсе хезмәткәрләре 10 нчы сыйныф укучыларына тематик сәгать үткәрделәр.​ Рөстәм Нәбиев һәм Дания Нагимның «Бөртекләп җыелган гомер» китабын тәкъдир иттеләр. Рөстәм Нәбиев 2015 елда Омск өлкәсендә солдат казармасы җимерелүеннән исән калганнарның берсе. Ул вакытта 24 кеше һәлак була. Рөстәм ике клиник үлем, җиде көн кома, 16 операция, 40 көн реанимация, 11 ай хастаханәгә яту кичерә. Аңа исән калу бәхете тиде, ләкин егет ике аягын да югалтты. Бу китапта Рөстәм үзенең фаҗигале язмышы турында сөйли. Үз фикерләре һәм кичерешләре белән уртаклаша. Авыр сынауларга карамастан, ул үзенең мөмкинлекләренә, көченә ышанычын югалтмый, өйләнә, ике кызы туа. Хәзерге вакытта тауларны яулый. Элекке десантчы социаль челтәрләрдә үзенең шәхси битен актив алып бара, аның өчен «Иң тормышны ныгытучы блог» номинациясендә премия ала.

Ә.Кәримуллин исемендәге район үзәк китапханәсендә «Алтын куллар» клуб берләшмәсенең чираттагы утырышы узды. Клуб җитәкчесе Альбина Шамилова плюшь җептән “Пончик” мендәрен бәйләү буенча мастер-класс үткәрде. Чара барышында китапханәче бәйләү өчен нинди эш кораллары һәм материаллар кирәк булачагын сөйләде. Чарада катнашучылар үзләрен бу сәнгатьтә сынап карадылар. Плюшьтән әйбер бәйләү-кызыклы процесс. Нәтиҗә һәрвакыт матур, кулдан ясалган әйберләрне һәркем зур бүләк итеп кабул итәчәк.

​ 19 октябрь көнне Саба район китапханәсенең уку залында хезмәт ветераны, "Өлкәннәр" клубының актив әгъзасы Галиуллин Мәгъсүм Вәли ​ улының 75 яшьлек юбилеена багышланган "Һәр тарафта үз кеше!" дип исемләнгән портрет-кичә үткәрелде. Ул гомер буе җитәкче даирәләрдә эшләгән. Эшчәнлеге “Фидакарь хезмәт өчен” медале , күпсанлы һөнәри бүләкләр, район һәм республика күләмендәге Мактау кәгазьләре белән билгеләнгән. Кичәдә юбилярны котлау өчен ветераннар советы җитәкчесе Ильясов Фәнил Ильяс улы, Саба районы Инвалидлар оешмасы җитәкчесе Миннегулов Әмин Ибраһим улы, "Өлкәннәр" клубының актив әгъзалары килгән иде. ​ Барысы да Мәгъсүм Вәли улын чын күңелдән котлап матур теләкләрен җиткерделәр. Юбиляр хөрмәтенә баянчы Мусин Ильназ һәм җырчы Айнур Гараев җыр башкардылар. Балалар, туганнар һәм дусларыннан видео-котлаулар күрсәтелде. Чара ахырында үзәкләштерелгән китапханәләр системасы директоры Билалова Ләйсән Рәкыйп кызы коллектив исеменнән Рәхмәт хаты һәм истәлекле бүләк тапшырды.

Күңел тынычлыгын югалткан заманда яшибез. Шушы авыр вакытларны ничек сабырлык белән үткәреп җибәрергә, өметләрне өзмәскә, авырлыкларны җиңеп чыгарга һәм башка бик күп төрле сорауларга җавап табар өчен 19 октябрь көнне район китапханәсендә “Иманга илткән юл” проекты кысаларында очрашуга Алмаз хәзрәт Галимҗановны чакырдык. “Диндә һәр сорауга җавап бар”дип исемләнгән чарага Саба гимназиясенең 10 сыйныф укучылары чакырылды. Диннең тормыштагы роле,бала белән әти-әни арасындагы мөнәсәбәтләр, туганлык җепләре, кыз-егет мөнәсәбәтләре, тормыш кыйммәтләре һәм башка бик күп төрле сорауларга Алмаз хәзрәт тулы җаваплар бирде. 

Саба район китапханәсе хезмәткәрләре 6 нчы Г, 10 нчы А һәм Б нчы сыйныф укучыларына тематик сәгать үткәрделәр. Рөстәм Нәбиев һәм Дания Нагимнең «Бөртекләп җыелган гомер» китабын тәкъдир иттеләр. Рөстәм Нәбиев 2015 елда Омск өлкәсендә солдат казармасы җимерелүеннән исән калганнарның берсе. Ул вакытта 24 кеше һәлак була. Рөстәм ике клиник үлем, җиде көн кома, 16 операция, 40 көн реанимация, 11 ай хастаханәгә яту кичерә. Аңа исән калу бәхете тия, ләкин егет ике аягын да югалта. Бу китапта Рөстәм үзенең фаҗигале язмышы турында сөйли. Үз фикерләре һәм кичерешләре белән уртаклаша. Авыр сынауларга карамастан, ул үзенең мөмкинлекләренә, көченә ышанычын югалтмый, өйләнә, ике кызы туа. Хәзерге вакытта тауларны яулый. Элекке десантчы социаль челтәрләрдә үзенең шәхси битен актив алып бара, аның өчен «иң тормышны ныгытучы блог»номинациясендә премия ала.

18 октябрьдә Саба район балалар китапханәсе хезмәткәрләре «Любознайки» клуб берләшмәсе өчен «М.Ю.Лермонтов дөньясы» дип  исемләнгән әдәби сәгать үткәрделәр. Мультимедиялы презентация ярдәмендә укучылар М.Ю. Лермонтов тормыш юлы һәм иҗаты буенча виртуаль сәяхәттә булдылар. Укучыларга М. Лермонтовның шигырь генә язмыйча, ә скрипкада һәм фортепианода уйнавы, үз шигырьләренә музыка язуы, картиналар да ясавы билгеле булды. Чара ахырында укучылар  «Парус», «Утёс», «Осень» һ.б. шигырьләрен сәнгатьле итеп укып күрсәттеләр.

Саба район балалар китапханәсе «День лермонтовской поэзии в библиотеке» дип исемләнгән XI Төбәкара акциясендә катнашты. Саба гимназиясенең 4 "Д" сыйныф укучылары өчен китапханәчеләр акция турында һәм рус шагыйре, талантлы рәссам, драматург М. Ю. Лермонтов тормышындагы якты вакыйгалар турында сөйләделәр. «Страницы жизни русского поэта» китап күргәмәсендә шагыйрьнең тормышы һәм иҗаты турында китапханәдә булган әдәбият, шулай ук аның әсәрләре тәкъдим ителде. Чара ахырында укучылар  «Парус», «Утёс», «Осень» һ.б. шигырьләрен сәнгатьле итеп укып күрсәттеләр.