ЯҢАЛЫКЛАР

«Авыл яши» проекты кысаларында, 18 июнь көнне Шәмәрдән авыл китапханәсе  «Дуслык» клуб берләшмәсе хатын-кызлары өчен «Бер очрашу үзе бер гомер» дигән очрашу кичәсе үткәрде. Очрашуга Садыкова Винера Рибус кызы чакырылган иде. Ул  39 ел Шәмәрдәннең беренче номерлы “Әкият” балалар бакчасында музыка җитәкчесе булып эшли. Хәзергесе вакытта ул лаеклы ялда.  Эшләгән эшенең нәтиҗәсе буларак аңа “Атказанган мәдәният хеәзмәткәре” дигән исем бирәләр. Чара барышында ул үзе белән булган кызык хәлләрне искә алды, бер кемгә дә күңелсезләнеп утырырга ара калдырмады. Җырлатты, чарага килгәннәрне төрле образларга кертеп уйнатты. Кыскасы үз эшенең остасы булган Винера Рибус кызы беркемне дә читтә калдырмады. Аңа безнең чарабызга килеп күңелләрне күтәреп киткәне өчен зур рәхмәтебезне белдерәбез.

Наркомания һәм наркотикларның законсыз әйләнеше белән көрәш-заманның актуаль темаларының берсе. Бу проблеманың актуальлеге бөтен дөньяда наркотикларга бәйлелекнең алкогольгә караганда ешрак һәм тизрәк барлыкка килүе белән бәйле. Наркомания-наркотик матдәгә бәйлелек, аны кабул итү теләге белән характерлана торган каты чир. Халыкны агарту максатыннан Олы Нырты авыл китапханәсендә «Наркомания — юл юклыкка»дигән китап күргәзмәсе оештырылды. Күргәзмәнең максаты-наркоманиянең яшьләр һәм яшүсмерләрнең физик һәм әхлакый сәламәтлегенә тискәре нәтиҗәләрен яктырту. Анда китаплар, наркомания, наркотиклар турында мәгълүмати материал, буклетлар һәм наркоманиягә каршы көрәшкә багышланган белешмәләр тәкъдим ителгән. Күргәзмәгә килүчеләрнең һәрберсе тәкъдим ителгән материал белән танышу нигезендә «наркотик» дигән куркыныч сүзнең үзендә нинди куркыныч яшерүен һәм аны куллануның нинди зарарлы нәтиҗәләргә китерүен аңлый алачак.

16 июньдә, күргәзмә белән танышканнан соң, китапханәче яшь буын арасында наркомания проблемасы, сәламәт яшәү рәвешенә тарту зарурлыгы турында фикер алышу оештырды. Бергәләп теләсә кайсы ситуациядән һәрвакыт уңай чыгу юлы бар дип карар кылдылар.

16 нчы июнь көнне Саба балалар сәнгать мәктәбенең Шәмәрдән филиалы укытучысы Фәтхуллин А.А. үзенең укучылары һәм аларның әти-әниләре өчен традицион Сабантуй оештырды " Вместе мы едины и не победимы" дип аталган бәйрәм уку елының күңелле тәмамлануы булды. Программа бай һәм күңелле булды, төрле уеннар һәм конкурсларны үз эченә алды. Катнашучылар "Кашыкка йомырка салып йөгерү", "Аркан тартышу", "Туп белән эстафета" һәм "Капчыкта йөгерү" кебек уеннарда дәртләнеп ярыштылар. Ачык һавада барысын да тәмле ризыклар көтте: мангалда пешкән ит, пылау һәм самовар чәе. Бәйрәм атмосферасы һәм күңел ачулар позитив кәеф тудырды. Чара укучыларны, аларның әти-әниләрен һәм укытучыны берләштерде, дуслык мөнәсәбәтләрен ныгытты.

Саба туган якны өйрәнү музеенда «Мирас» туган якны өйрәнү клубының чираттагы утырышы оештырылды. "Тарих йөзләрдә" тарихи сәгате үткәрелде. Утырыш барышында сугыш елларыннан соң Саба районының җитәкче вазыйфасы затларын искә алдылар. Шулай ук легендар очучы - герой Алексей Маресьев тарихы да күтәрелде.

Агач савыт-сабаларны бизәп ясаган сувенирлар буыннан-буынга тапшырылып, үсеп килүче яшьләр тарафыннан да югары бәяләнә. Шул сәбәпле, Саба туган якны өйрәнү музее хезмәткәрләре Ш.З. Зиннуров исемендәге Сатыш урта мәктәбенең “Кояшкай” лагерына йөрүче укучылар өчен агач эшләнмәләрне буяу буенча мастер-класс үткәрделәр.  Укучылар күрсәтелгән үрнәкләрне зур кызыксыну белән карадылар, агач эшләнмәләрне буяу ысуллары белән таныштылар. Агачка рәсем ясау матурлыкны тудырырга, аны күрә белергә өйрәтә, кулларның эшчәнлеген, сизгерлеген арттыра.  Әлеге эшләнмәләрне интерьер бизәге буларак та, бәйрәмгә бүләк итү өчен дә кулланырга мөмкин.

Саба урман хуҗалыгы тарихы музеенда балалар өчен «Сөйлә, курыкма!» дип исемләнгән мәгълүмат сәгате үткәрелде. Тормышта кыенлыклар һәм сораулар күп. Һәр кеше үзенә ярдәм кирәк булган вәзгыятькә эләгергә мөмкин. Бу моментта ишетелү мөһим! Ышаныч телефоны-ул дуслар һәм якыннар белән мөнәсәбәтләр, мәктәп һәм гаилә мөнәсәбәтләре турында фикер алышу өчен аноним рәвештә, бушлай һәм конфиденциаль рәвештә мөрәҗәгать итәргә мөмкин булган хезмәт. РФнең теләсә кайсы торак пунктында стационар һәм кәрәзле телефоннардан шалтырату вакытында балалар һәм аларның ата-аналары ашыгыч психологик ярдәм алырга мөмкин, аны гамәлдәге төбәк хезмәтләре белгечләре күрсәтә.

31 нче майда Шәмәрдән филиалы Х. һәм А. Вәлиуллиннар исемендәге Саба  балалар сәнгать мәктәбенең тынлы кораллар  бүлегендә укучы  балалар А. А. Фатхуллин җитәкчелегендә Мәскәүнең Колонный залында XXXI Халыкара «Союз талантов России» фестиваль-конкурсында катнашты. Конкурста Россиянең төрле төбәкләреннән һәм Беларусстан 2500 дән артык балалар катнашты. Безнең оркестр Татарстан Республикасын патриотик «Дефиле марш» номеры белән инструменталь башкару номинациясендә тәкъдим итте. Чыгышыбыз танылган артистлар, музыкантлар һәм хореографлардан торган жюри тарафыннан югары бәяләнде. Нәтиҗәдә без 1 дәрәҗә лауреат исеме белән бүләкләндек, бу зур горурлык һәм әһәмиятле җиңү булды.

Балаларны яклау көне - якты, шатлыклы бәйрәм. 1 июнь белән җәй башлана, бу көн хаклы рәвештә безнең балаларныкы. Балаларда безнең шатлык һәм өметебез, хезмәтебез һәм бәхетебез.

Олы Нырты авыл мәдәният йорты, китапханәсе, Чабья Чурчи авыл клубы хезмәткәрләре Халыкара балаларны яклау көне уңаеннан балалар Сабантуе үткәрделәр. Мәктәпкәчә яшьтәге балалар һәм башлангыч сыйныф укучылары «Кашыкта йомырка белән йөгерү», «Өч аяклы», «Аркан тартышу», «Таяк тартышу», «Капчык киеп йөгерү" һәм башка бәйгеләрдә осталык, тапкырлык һәм җитезлектә ярыштылар. Бәйрәм ахырында балалар тәм-том белән сыйланды.

1 июнь көнне Байлар Сабасының үзәк мәйданында балаларны яклау көненә багышланган «Бәхетле балачак» бәйрәм концерты узды. Мәдәният бүлеге җитәкчесе Заһидуллин Р.Ф. төрле конкурсларда катнашып,  Гран-при откан  җиңүчеләрне котлады һәм акчалата премиягә сертификат тапшырды. Шулай ук, «Талантлы балачак» конкурсына йомгак ясалды. Җиңүчеләр дипломнар һәм кыйммәтле бүләкләр алды, бу алар өчен күңелле сюрприз булды.

Сәхнәдә балалар сәнгать мәктәбе укучылары, шулай ук конкурста җиңүчеләр башкарган җырлар, көйләр яңгырады, биюләр башкарылды. Балаларның чыгышлары энергия һәм бай хис -кичерешләр белән тулы иде, ә дәртле биюләр бәйрәм атмосферасына аерым бер ямь өстәде. Бу көн балалар һәм аларның ата-аналары өчен чын бәйрәмгә әверелде.

30 майда Балалар сәнгать мәктәбенең актлар залында күңелле һәм онытылмаслык вакыйга - чыгарылыш кичәсе булды, ул чын мәгънәсендә музыка һәм талантлар бәйрәменә әверелде. 44 талантлы укучы сәнгать мәктәбен тәмамлау турында беренче таныклыкларын алды.

Балалар сәнгать мәктәбе директоры Газизов А.З. уку елларында һәр укучының талантын үстерүгә үзләренең белемнәрен, тәҗрибәләрен һәм күңелләрен салган укытучыларга рәхмәт сүзләрен җиткерде. Аерым рәхмәт сүзләре чыгарылыш сыйныф укучыларының әти - әниләренә җиткерелде. Мәдәният бүлеге җитәкчесе Заһидуллин Р.Ф. кичәнең тантаналы өлешен таныклыклар тапшыру белән ачып җибәрде. Мәктәпне тәмамлаучыларның әти-әниләреннән җавап сүзе мәктәптә уңай һәм иҗади атмосфера тудырган, балаларыбыз үсешенә бәяләп бетергесез өлеш керткән өчен бөтен коллективка юлланды.