ЯҢАЛЫКЛАР

2022 елның 15 ноябрендә Саба балалар сәнгать мәктәбендә баян сыйныфы укучылары өчен «Саба районының танылган мәдәният һәм сәнгать эшлеклеләре» дигән иҗади әңгәмә-викторина үткәрелде.

 Иштуган мәдәният йортында Шәмәрдән лицее «Рост» катнашында шоу-проект «Җырлыйк әле!» узды. Музыкаль өлеш белән Шәмәрдән мәдәният йорты тавыш режиссеры А.И.Усманов катнашты. Шулай ук музыкаль номер белән «Акварель» халык бию коллективы чыгыш ясады. Катнашучыларга үзләренең вокаль мәгълүматларын күрсәтергә туры килде. Программа уен формасында өч этапта узды. Шоу-проектның уникальлеге шунда ки, катнашучылар халык җырларын бары тере музыка астында гына башкардылар. Шоу-проектның жюри составында Шәмәрдән мәдәният йорты мөдире Г.М.Әхмәтшина һәм методист Г.Х.Садыйкова булды. Бу тамашада катнашкан һәркем яхшы тәэсир һәм уңай эмоцияләр алды.

Бигәнәй мәдәният йортында китапханә белән берлектә кече яшьтәге мәктәп балалары өчен «Фольклор иленә сәяхәт»дигән әдәби - танып белү сәяхәте уздырылды . Чараның максаты-балаларны татар халык әкиятләре, мәкальләр һәм әйтемнәр, уеннар белән таныштыру; балаларның татар мәдәниятенә карата кызыксыну тәрбияләү. Чара татар халкының гореф-гадәтләре турында әңгәмә рәвешендә уздырылды, мәкальләр һәм әйтемнәр, җырлар һәм әкиятләр, татар халкының уеннары белән таныштырылды. Чара ахырында яшь укучыларга әлеге тематика буенча китаплар тәкъдим ителде.

13 ноябрь көнне Сатыш авылы мәдрәсә музеенда “Авылым тарихы эзләреннән” дип исемләнгән очрашу үткәрелде. Чарада “Туган якны өйрәнүчеләр” клубының эшчәнлегенә анализ ясалды. Очрашуда катнашучы авылыбызның өлкән мөхтәрәм кешесе, үткән тарихи кызыклы вакыйгаларны газета битләрендә яктырып баручы Шакиров Габделәхәт абый, авыл тарихын барлауга зур өлеш кертүче Багабиев Альберт абый белән Рузилә апа да үз фикерләрен җиткерделәр. Чарада үзәклештерелгән музейлар системасы җитәкчесе Саитова Венера Равил кызы да катнашып берләшмәнең эшен уңай бәяләде, изге теләкләрен җиткерде.

11 һәм 12 ноябрь көннәрендә Лаеш районының Троицкий бистәсендә Рөстәм Бикмуллин исемендәге XXI республика яшьләр музыка-шигъри фестивале узды .

1990 елның 31 августында Татарстан Республикасы Югары Советы тарафыннан Татарстан Республикасының Төп Законын эшләү өчен  президент җитәкчелегендә Конституция комиссиясе төзү турында Карар кабул ителә. 1992 елның 6 ноябрендә Югары Советның XII сессиясендә Татарстан Республикасы Конституциясе кабул ителә. Бу төрле милләт, сәяси бәйләнешләр һәм диннәр- кешеләрне берләштергән, республиканың күпмилләтле халкының чагылышын гәүдәләндергән  Россия һәм Татарстан тарихында яңа чор таләпләренә тулысынча җавап бирә торган мөһим сәяси-хокукый документ.  6 ноябрь республикада бәйрәм көне - Татарстан Республикасы Конституциясе көне дип игълан ителде. Әлеге истәлекле көн хөрмәтенә, мәдрәсә музей хезмәткәрләре мәгълүмати-танып белү сәгате уздырды.

Саба урман хуҗалыгы тарихы музеенда Кукмара шәһәренең А.М. Булатов исемендщге лицееның 5нче сыйныф укучылары булып китте. Алар өчен Лесхоз бистәсенең туристик маршруты буенча экскурсия үткәрелде, ә чараның кульминациясе булып матрешка һәм солдат буявы буенча мастер - класс булып үтте.

Бүген, 2022 елның 9 ноябрендә «Хөснулла һәм Аллаһияр Вәлиуллиннар исемендәге Саба балалар сәнгать мәктәбенең» сәнгать бүлегендә 1 нче сыйныф укучылары һәм Газизова Гүзәл Равил кызы белән “Прикладная композиция” фәне буенча “Татар халык орнаменты мотивлары буенча аппликация” темасына ачык дәрес үтте.

7 ноябрь көнне район мәдәният йортында район мәдәният йорты үзешчәннәре тарафыннан “Кызыма килер йөз кеше” спектакле куелды.

28 октябрьдә район мәдәният йортында “Мизгел” театр коллективы куелышындагы “Ялгыз каен күзе” спектаклен чираттагы мәртәбә күрсәтү булды. Бу кичне зал тамашачылар белән тулы иде, бу аларның театр язмышына битараф түгеллеген һәм коллетив эшенә югары бәя бирүен ачык күрсәтә. Тамашачылар аягүрә басып артистларга кул чапты.