ЯҢАЛЫКЛАР

27 март көнне Югары Симет мәдәният йорты китапханәче белән берлектә медицина хезмәткәре һөнәре белән танышу максатында авыл фельдшеры Мифтахова Зөлфия белән очрашу оештырды. 

23 март көнне Югары Симет мәдәният йорты хезмәткәрләре, авыл китапханәсе белән берлектә, "Нәүрүз килә, Нәүрүз" исемле халык бәйрәме үткәрделәр. Бу халык бәйрәмен бәйрәм итү традицияләре ерак тарихыбызга барып тоташа. Әмма элеккечә үк бу бәйрәмне җырлар, биюләр, конкурслар белән каршы алу гадәте бар. Бәйрәм кунаклары тәмле "Карга боткасы", тәм-томнар белән сыйландылар, җырладылар, биеделәр, күңелле уеннарда катнаштылар. Балалар да, өлкәннәр дә көч һәм җитезлектә актив катнаштылар.

Югары Симет мәдәният йортында ирләр өчен бильярд буенча ярышлар үткәрелде. Бильярд- спорт кына түгел, ул мавыктыргыч интеллектуаль уен да. Ул җитезлекне, хәрәкәтләрне координацияләүне һәм тактик фикерләүне үстерә. Уен барышында безнең ир-атлар үзләренең осталыкларын һәм җитезлекләрен күрсәттеләр, һәркем көндәшләрен җиңәргә теләде, ә җанатарлар дусларын хуплады. Чара кызыклы һәм мавыктыргыч узды. Бу спорт төренә беркемнең дә кызыксынуын югалтмавы шатлыклы, чөнки төгәллек, нык кул, яхшы күз , стратегик фикерләү һәрвакыт бәядә булды һәм булачак та.

Югары Симет "Ромашка" балалар бакчасында 8 март - Халыкара хатын-кызлар көне билгеләп утелде. Кичәгә балаларның әниләре, дәү әниләре чакырылды. Матур җыр - биюләр,  күңелле уеннары белән балалар үзләренең якын кешеләрен җылы тәбрикләде.  Чара бик матур булып истә калды.

8 Март-Халыкара хатын-кызлар көне, бу-кешелекнең гүзәл яртысы үз адресына бүләкләр һәм теләкләр кабул иткән чор. Бу беренче язгы мәрхәмәт, яктылык, тормыш һәм мәхәббәт бәйрәменә багышланган «Яз, чәчәкләр һәм комплиментлар» бәйрәм концерты булды, ул Югары Симет мәдәният йортында китапханә һәм Түбән Симет авыл клублары белән берлектә узды. Концерт авыл җирлеге башлыгы И. Р. Әхмәдуллинның котлавы белән башланып китте.

 9 март көнне Түбән Симет авыл клубында Югары Симет мәдәният йорты һәм авыл китапханәсе хезмәткәрләре белән берлектә авылның гүзәл яртысы өчен "Яз гүзәле – хатын кыз!" дип исемләнгән кичә үткәрделәр.

Югары Симет урта мәктәбендә 8 март көненә багышланган концерт булды! Балалар үз сәләтләрен күрсәттеләр. Атмосфера шатлык һәм язгы кәеф белән тулган иде. Һәр номер уникаль булды һәм онытылмаслык тәэсирләр калдырды. Бәйрәм белән, кадерле хатын-кызлар!

4 март көнне Халыкара хатын-кызлар көне алдыннан тыл хезмәтчәннәренә «1941-1945 еллардагы Бөек Ватан сугышында Җиңүгә 80 ел» истәлекле медальләре тапшырылды. Галимова Галимә Габдрахман кызына  истәлекле медальне Саба муниципаль районы башкарма комитеты аппараты җитәкчесе Кәримов М.Р., Югары Симет авыл җирлеге сәркәтибе Шәйхлиева Л.Р. һәм Югары Симет урта мәктәбенең «ЮНАРМИЯ "хәрәкәте активистлары тапшырды.

Югары Симет  урта  мәктәбендә февраль ае хәрби-патриотик тәрбия айлыгы буларак  үтте. Айлык кысаларында, мәктәптә бик күп чаралар үткәрелде. Укучылар ике командага бүленеп җитезлектә , тапкырлыкта көч сынаштылар.

Саба аграр көллиятендә Татар КВН лигасының муниципаль этабы узды. Фестивальдә Югары Симет авыл җирлегенең "Бәлеш" командасы катнашты һәм 8 команда арасында җиңеп, Гран-при яулады. Без командабызга актив катнашулары өчен рәхмәт белдерәбез һәм алдагы уеннарда уңышлар телибез.